Depresio (medicino)

Depresio (latine depressio de la latina deprimere, "malsuprenpremi") estas mensa malsano apartenanta al la afektaj malordoj, laŭ psikiatria klasifiko. Ĉi tiu malsano karakteriziĝas per malalta humoro, malpliigita memestimo, perdo de ĝojo kaj intereso pri la vivo, kaj anhedonio (la malkapablo sperti plezuron en aktivecoj, kiuj kutime estas ĝuaj). Oftaj simptomoj inkluzivas cerbumadon, senton de senesperemo, kaj reduktitan iniciatemon. Depresio malpliigas la labor-kapablon kaj malbonigas la ĝeneralan vivkvaliton de la suferanto.

Grava depresia perturbo (GDP), konata ankaŭ kiel klinika depresio, estas specifa tipo de depresia perturbo karakterizita per almenaŭ du semajnoj de persista malalta humoro, perdo de intereso aŭ plezuro en ĉiutagaj aktivecoj, malfacilaĵoj koncentriĝi, dormperturboj, kaj signifaj ŝanĝoj en pezo. La termino estis unue enkondukita en la 1970-aj jaroj kaj estis adoptita de la Usona Asocio pri Psikiatrio en la Diagnoza kaj Statistika Manlibro de Mensaj Malordoj (DSM-III). En la pli nova eldono de DSM-5, depresiaj perturboj estas klare distingitaj de aliaj humoraj perturboj.

La kaŭzoj de depresio estas ankoraŭ ne plene komprenataj, precipe la biologiaj mekanismoj. Tamen, psikoterapio kaj kontraŭdeprimiloj estas ofte uzataj traktadoj. Krom malalta humoro, simptomoj povas inkluzivi sendormecon, troan dormemon, senton de kulpo kaj memmalestimo, psikomotora malrapidiĝo, kaj mankon de apetito.

Grava depresia perturbo ofte kaŭzas gravan negativan influon en diversaj kampoj de la vivo de la paciento, inkluzive de familiaj rilatoj, laboro, akademiaj rezultoj, kaj ĝenerala sano. Proksimume 3.4% de tiuj, kiuj suferas de grava depresio, sinmortigas, kaj granda parto de tiuj, kiuj sinmortigis, suferis de depresiaj aŭ aliaj humoraj perturboj.

En ĉiutaga lingvaĵo, la termino "depresio" estas ofte konfuzata kun deprimo, kiu rilatas al malpli gravaj kaj pasemaj humoraj faloj. Tamen, grava depresia perturbo estas kompleksa sindromo, kiu postulas specialan diagnozon kaj traktadon, ĉar ĝi inkluzivas multajn simptomojn kaj ne ĉiam manifestiĝas per malĝoja aŭ subpremita humoro.

• Deprimo
• Psikoterapio
• Antidepresiaĵo
• Mensaj malsanoj

• En tiu ĉi artikolo estas uzita traduko de teksto el la artikolo Depression en la germana Vikipedio.
• En tiu ĉi artikolo estas uzita traduko de teksto el la artikolo Major depressive disorder en la angla Vikipedio.
• En tiu ĉi artikolo estas uzita traduko de teksto el la artikolo Dépression (psychiatrie) en la franca Vikipedio.
• En tiu ĉi artikolo estas uzita traduko de teksto el la artikolo Trastorno depresivo mayor en la hispana Vikipedio.
• En tiu ĉi artikolo estas uzita traduko de teksto el la artikolo Zaburzenia depresyjne en la pola Vikipedio.
• En tiu ĉi artikolo estas uzita traduko de teksto el la artikolo Большое депрессивное расстройство en la rusa Vikipedio.